Сустрэча з пісьменнікамі


26 лістапада ў ДУА “Аўсянкаўская сярэдняя школа Горацкага раёна” адбылася цікавая і запамінальная сустрэча з пісьменнікамі Горацкага краю, прысвечаная юбілейнай даце, — 140-годдзю з дня нараджэння Янкі Купалы і Якуба Коласа. Нягледзячы на неспрыяльнае лістападаўскае надвор’е і суботні дзень, большасць вучняў 5–11 класаў прыйшлі ва ўстанову адукацыі, каб бліжэй пазнаёміцца з паэтамі-землякамі, людзьмі творчымі, таленавітымі

Кіраўнік народнага літаратурнага аб’яднання “Роднае слова” Людміла Дзеружкова прадставіла прысутным гасцей: членаў Саюза пісьменнікаў Беларусі Наталлю Ніканчук, Алесю Цэван, а таксама Аляксандра Ведзянеева. Потым расказала вучням пра само літаратурнае аб’яднанне, у якое уваходзіць на сённяшні дзень 25 чалавек. Створана яно было ў 1986 годзе. На слайдах вучні ўбачылі фатаграфіі не толькі сучасных паэтаў-землякоў, але і прадстаўнікоў старэйшага пакалення — Ніны Кавалёвай, Сяргея Кісялёва, Аляксандра Клачкова, Міхаіла Уласенкі, Анатоля Прохарава і іншых. Некаторыя з іх, на жаль, пайшлі ўжо з жыцця. Гледзячы на гэтыя фотаздымкі, усе адчулі гонар за свой родны край, за тых, хто праславіў яго сваімі цікавымі творамі.

Людміла Мікалаеўна паведаміла, што аўтары, якія сёння прысутнічаюць у школе, не толькі пішуць вершы, апавяданні, казкі, раманы, але і ўдзельнічаюць у розных абласных, рэспубліканскіх літаратурных фестывалях і конкурсах.

Наталля Ніканчук з усёй шчырасцю чытала свае вершы на беларускай мове. Вучні даведаліся, што Наталля Валянцінаўна працуе ў розных жанрах: вершы, паэмы, апавяданні, раманы. З вялікім задавальненнем усе слухалі невялікае апавяданне “Згублены гузічак”. Пасля пачутага згадзіліся з паэтэсай, што кожны павінен быць на сваім месцы і прыносіць карысць. Наталля Валянцінаўна любіць маляваць, і многія ілюстрацыі ў зборніках асабіста яе. Дзеці пазнаёміліся з кнігай вершаў “Любоў — крылатая істота”, кнігай прозы “…Кранаючы неба рукамі”, якія прывезла з сабой пісьменніца.

З вялікай увагай удзельнікі сустрэчы слухалі Алесю Цэван, якая піша вершы і на рускай, і на беларускай мовах. Пагарталі яе зборнікі “Овеянная нежностью небес” і “Отпечаток Мечты”. Між іншым, Алеся Дзмітрыеўна — маці трох дзетак, таму не дзіўна, што многа вершаў, казак, апавяданняў у яе для маленькіх чытачоў. Даведаліся, што некаторыя вершы паэтэсы пакладзены на музыку магілёўскім кампазітарам Аляксандрам Кажурыным. А яшчэ пісьменніца з’яўляецца пераможцай міжнароднага літаратурнага конкурсу “Новыя галасы”. На памяць аб сабе пісьменніца пакінула ў школе зборнік вершаў “Отпечаток Мечты”.

Аляксандр Ведзянееў родам з Горацкага раёна. Ён таксама піша вершы на беларускай і рускай мовах. Дзецям напомніў, што родная мова дадзена нам продкамі, і яе трэба берагчы. Аляксандр Валер’евіч піша вершы духоўнай, патрыятычнай, філасофскай, любоўнай тэматыкі. Прачытаўшы некалькі сваіх вершаў, паэт зрабіў выснову, што памяць народа — гэта самае вялікае багацце, якое і называецца спадчынай. Род і народ яднаюцца адным словам — Радзіма. Любіць яе —значыць ведаць яе мінулае, жыць яе цяперашнім, клапаціцца пра яе будучыню. У адным са сваіх твораў паэт прызнаецца: “Куды б ні закінуў нас лёс, якія б экзатычныя краявіды мы ні пабачылі, нас заўсёды клічуць да сябе беларускія лясы і палі, азёры і рэкі”. Вучням цікава было пазнаёміцца з кнігай “Душою всей на Бога уповая”, у якой вершы напісаны спосабам акраверша. Гэта значыць, пачатковыя літары радкоў ствараюць якое-небудзь слова. Такая незвычайная форма вершаў вельмі здзівіла і ўразіла. Паэт падпісаў і падарыў школе гэты зборнік вершаў.

Шчырымі апладысментамі і дарослыя, і дзеці выказалі сваю ўдзячнасць паважаным гасцям. Думаецца, сустрэча пакінула добры і незабыўны след у сэрцах усіх, хто на ёй прысутнічаў. І заўсёды на зямлі Купалы і Коласа будзе гучаць роднае слова: трывалае, прачулае, разумнае, ласкавае.

Таццяна ДЗЕМЯНКОВА,
настаўніца беларускай мовы і літаратуры ДУА
“Аўсянкаўская сярэдняя школа Горацкага раёна”