Стала добрай традыцыяй у школе мастацкіх рамёстваў праводзіць Ёлку для дзяцей на Каляды. Раней гэтым святам завяршалі стары год і пачыналі новы. Мэта нашага мерапрыемства прывіць дзецям цікавасць да гісторыі і абрадаў роднай краіны, садзейнічаць развіццю фантазіі і творчых здольнасцей.
У святочна ўпрыгожанай зале дзяцей чакала ёлка, убраная цацкамі, зробленымі рукамі вучняў школы з гліны, саломкі і іншых прыродных матэрыялаў. Гасцей сустракалі гаспадар з гаспадыняй. На стале засланы новы абрус, ён устаўлены мноствам розных страў, запалена свечка, каб багацце памнажалася, ды хваробы ў хаце не было.
На свята завіталі калядоўшчыкі. Яны шумна і весела віншавалі ўсіх прысутных з Раством, зычылі здароўя і багацця. Прыйшлі госці з Казой і Мядзведзем, традыцыйнымі героямі Калядак, якія добра павесялілі дзяцей танцамі.
Радасць дзецям прынеслі і Дзед Мароз са Снягуркай, а таксама казачныя героі — Баба Яга, Кікімара і Лешы.
З вялікім захапленнем вучні школы разам з каляднымі персанажамі вадзілі карагоды, расказвалі вершы, спявалі навагоднія песні, разгадвалі загадкі, спаборнічалі ў гульнях. Кожны ўдзельнік Калядак атрымаў ад Дзеда Мароза цукеркі.
У час свята былі падведзены вынікі ўнутрышкольных конкурсаў. За лепшыя творчыя работы Дзед Мароз уручыў дзецям сувеніры.
Хочацца падзякаваць настаўнікам і вучням школы, якія сваімі выступленнямі, творчымі знаходкамі надалі святу асаблівы настрой, выклікалі ва ўсіх яго ўдзельнікаў эмацыйны ўздым. І павіншаваць калектыў, дзяцей і іх бацькоў з навагоднімі святамі і Калядамі, пажадаць творчых поспехаў, здароўя, сямейнага дабрабыту, мэтанакіраванасці і ўсяго самага найлепшага.
Людміла СТАЎСКАЯ,
дырэктар ДУА “Дзіцячая школа мастацтваў і мастацкіх рамёстваў г. Горкі”.
Фота Міхаіла ЛЯЎЦОВА.