Дэлегацыя Горацкага раёна ўдзельнічала ў мерапрыемстве да 10-годдзя стварэння музейнага пакоя «Паэтычная зорка маленькай радзімы» паэтэсы-зямлячкі, члена Саюза пісьменнікаў Беларусі (1997 г.) Ніны Кавалёвай. Літаратурна-музычная вечарына з гэтай нагоды адбылася ў Цемналескім сельскім клубе Дрыбінскага раёна
З біяграфіі паэтэсы
Нарадзілася Ніна Дзмітрыеўна ў вёсцы Еськаўка на Дрыбіншчыне ў сям’і Ганны Ягораўны і Дзмітрыя Андрыянавіча Кавалёвых. З 1986 года сям’я жыла ў г. Горкі.
Ніна Кавалёва – аўтар 25 паэтычных зборнікаў для дарослых і дзяцей. Яна з’яўлялася актыўным членам народнага літаратурнага аб’яднання «Роднае слова» пры ДУК «Горацкі раённы гісторыка-этнаграфічны музей», ганаровым членам літаратурнага аматарскага аб’яднання «Вянок Дрыбіншчыны», створанага на базе ДУК «Дрыбінская бібліятэчная сетка». Ніна Кавалёва з’яўлялася ганаровым членам Горацкай раённай арганізацыі ГА «Беларускі саюз жанчын», была ў складзе ваенна-гістарычнага клуба «Авіягрупа 122» (г. Масква). У 2019 годзе Горацкім раённым выканаўчым камітэтам Ніне Кавалёвай прысвоена ганаровае званне «Чалавек года-2018» у намінацыі «Грамадска-палітычная дзейнасць». У 2020 годзе яна атрымала званне лаўрэата рэспубліканскага конкурсу «Жанчына года-2019» у намінацыі «Духоўнасць і культура». На жаль, 16 сакавіка 2020 года Ніна Дзмітрыеўна пакінула гэты свет. Паэтэса пахавана на грамадскіх могілках у г. Горкі Магілёўскай вобласці.
Дзеля памяці аб цудоўным чалавеку
Дзейнасць літаратурнага музейнага пакоя на базе сельскай бібліятэкі – адзіны ўнікальны вопыт у бібліятэчнай справе на Магілёўшчыне. Бібліятэчны праект па стварэнні музейнага пакоя на малой радзіме Ніны Кавалёвай адзначаны Дыпломам другой ступені ў XXII рэспубліканскім конкурсе «Бібліятэка – асяродак нацыянальнай культуры» ў намінацыі «Інавацыйная дзейнасць». На базе музейнага пакоя праводзяцца раённыя, міжраённыя, абласныя і рэспубліканскія семінары. Так, у 2022 г. дзейнасць бібліятэкі-філіяла была прадстаўлена на Міждзяржаўным семінары «Приграничная библиотека в историко-культурном диалоге», які праходзіў на базе Клімаўскай міжпасялковай цэнтральнай бібліятэкі ў Бранскай вобласці.
Каштоўныя экспанаты музейнага пакоя вельмі запатрабаваны сярод землякоў Ніны Кавалёвай. Тут праходзяць экскурсіі і ладзяцца шматлікія мерапрыемствы.
На цяперашняй літаратурна-музычнай вечарыне «Паэтычная зорка маленькай радзімы» прысутнічалі загадчык сектара культуры Дрыбінскага райвыканкама Яўген Мова і дырэктар ДУК «Дрыбінская бібліятэчная сетка» Святлана Верам’ёва, член Саюза пісьменнікаў Беларусі Святлана Цмугунова і паэтэса Дзіна Рамадзіна. У мерапрыемстве ўдзельнічала былы дырэктар Дрыбінскай бібліятэчнай сеткі Тамара Салтанава.
У накірунку захавання і папулярызацыі творчасці знакамітай зямлячкі бібліятэкар Алена Шэвардова плённа супрацоўнічае з калегамі з Горацкага раёна. У складзе горацкай дэлегацыі на мерапрыемства завіталі дырэктар ДУК «Горацкая раённая бібліятэчная сетка» Алена Марозава, кіраўнік народнага літаратурнага аб’яднання «Роднае слова» Людміла Дзеружкова і члены аб’яднання – горацкая салістка Надзея Курбасава і пісьменніца Людміла Дзёменская.
Госці падзяліліся ўспамінамі пра нашу славутую зямлячку, адзначылі каштоўнасць і актуальнасць яе літаратурнай спадчыны. Шмат цёплых слоў і пажаданняў прагучала ў адрас бібліятэкара і ўсіх землякоў паэтэсы, якія маюць дачыненне да стварэння і дзейнасці музейнага пакоя. Да 75-годдзя з дня нараджэння Ніны Кавалёвай супрацоўнікамі цэнтральнай бібліятэкі імя Максіма Гарэцкага быў падрыхтаваны бібліяграфічны даведнік аб жыцці і творчасці паэтэсы, які стане яшчэ адным каштоўным экспанатам у фондзе музейнага пакоя.
У выкананні Надзеі Курбасавай прагучалі песні на словы Ніны Кавалёвай «Верность» і «Молодой лейтенант».
Настаўнікі і вучні ДУА «Цемналеская базавая школа» сістэматычна звяртаюцца да бібліятэкара з мэтай напісання навукова-даследчых работ аб жыцці і творчасці знакамітай зямлячкі. У выкананні вучняў гучалі вершы Ніны Кавалёвай «Бусел над Проняй», «Под небом Родины», «Калі забаліць…», «Весенний дождик», «Взлетное поле», «Цветы на вышивках войны», а таксама прадстаўлена інсцэніроўка па творы «Кому поставите на вид, когда тут каждый вундеркинд?».
У сваёй творчасці Ніна Дзмітрыеўна часта звярталася да тэмы Вялікай Айчыннай вайны. У апошнія месяцы жыцця яна займалася пошукавай дзейнасцю разам з зямлячкай Аленай Шутавай, афіцэрам запасу, ветэранам атрада спецыяльнага прызначэння «Русь», членам пошукавага клуба «Виккру». Алена Іванаўна прыслала відэазапіс, у якім расказала пра гісторыю свайго знаёмства з Нінай Дзмітрыеўнай, прачытала ўрывак з асабістага дзённіка і верш паэтэсы «Для чего ты живёшь на земле…».
Да мерапрыемства была падрыхтавана літаратурная выстава, прысвечаная жыццю і творчасці паэтэсы, і медыяпрэзентацыя «Зорка таленту Ніны Кавалёвай». У выкананні народнага ансамбля народнай песні «Журавінка» Цемналесскага сельскага клуба прагучалі песні на словы Ніны Кавалёвай «Вёсачка», «Цемналескі вальс», «Рэчка, рэчанька…».
Музейны пакой Ніны Кавалёвай «Паэтычная зорка маленькай радзімы» – каштоўны здабытак у літаратурнай спадчыне Магілёўшчыны. Жыццёвы і творчы шлях знакамітай зямлячкі – прыклад сапраўднага патрыятызму і духоўнага багацця чалавека, які можна параўнаць з крынічнай вадой, што вяртае да жыцця ў спякотны дзень.
Галіна КАЖЭЎНІКАВА
Фота членаў дэлегацыі Горацкага раёна